Se tes unha conexión de por exemplo 100Mbps, é normal non alcanzar nunca esa cifra nas medicións do velocímetro. Son moitas as razóns, as máis importantes indicámoschas aquí.

datos de sinalización

• en conexións entre ordenadores, unha parte dos datos úsanse para 'sinalizar' o envío de información ('abrir conexión', 'pechar conexión', 'anaco recibido', 'anaco non recibido', etc.); eses sinais ocupan parte da velocidade dispoñible na túa conexión polo que a velocidade 'aparente' sempre é un pouco menor

usas unha conexión de R?

• o noso velocímetro conéctase a un servidor de internet aloxado en R: isto significa que se o utilizas dende unha conexión de R o resultado será moito máis exacto que se o utilizas dende unha conexión con outro operador, porque dese xeito os datos envíanse e recíbense a través de internet, pasando por redes de terceiros
• é dicir, se por exemplo usas o velocímetro cun ADSL de 1Mbps doutro operador, os datos viaxan a través da túa conexión a ese operador, á rede dese operador, internet e á rede de R ata o servidor do velocímetro, polo que toda esa 'distancia' e elementos intermedios fan que a conexión sexa máis lenta

rendemento do teu ordenador

• un ordenador lento pode non ter suficiente capacidade para usar o máximo da túa conexión de R; tamén, se ten programas funcionando que o retarden, como antivirus, cortafogos/firewalls e similares, podería facer diminuír a velocidade da conexión
• Para sacarlle o máximo partido á túa conexión de 100 megas, maximiza o rendemento do teu ordenador. Dámosche algunhas pistas aquí.

aplicacións que usan internet

• lembra que para facer o cálculo, se che pide que peches TODOS os programas agás o navegador; calquera programa en execución pode estar usando a rede e diminuír a capacidade de conexión dispoñible para o velocímetro
• esta recomendación vai sobre todo a aplicacións de descarga tipo P2P como emule ou bittorrent que consumen normalmente o 100% da conexión e cos que é imposible realizar probas fiables
• se tes máis xanelas de navegador abertas, péchaas tamén, porque poderían estar a recargar todo ou parte das súas páxinas
• no teu ordenador é moi probable que haxa aplicacións executándose e conectándose a internet de forma habitual: por exemplo, cando o teu sistema operativo ou algunha aplicación consultan se hai versións novas ou directamente descargan actualizacións de internet; todo ese tráfico inflúe no cálculo do velocímetro

outros ordenadores na mesma rede

• se o ordenador dende o cal realizas a proba co velocímetro non é o único que accede á rede coa mesma conexión (por exemplo, se tes un cablemódem WIFI de R e varios ordenadores na casa) entón deberías apagar os outros ordenadores ou polo menos pechar todos os programas que puidesen estar conectándose á rede (sobre todo aplicacións de descarga tipo P2P como emule ou bittorrent)

redes sen fíos

• se utilizas unha rede WIFI ou similar para conectarte a internet ten en conta que podería haber outros ordenadores usándoa e restándoche velocidade
• ademais, asegúrate de que a túa conexión á rede é  boa dabondo; se o ordenador está moi lonxe do router sen fíos ou non ten cobertura suficiente, é posible que a túa conexión baixe a 4 ou 1Mbps, o que non che permite probar unha conexión a internet de R de por exemplo 8Mbps;
• se a túa rede WIFI é de 11Mbps, non é suficiente para probar unha conexión de R de 6Mbps ou máis, debido a que os 11Mbps de WIFI son teóricos e non chega a alcanzalos nunca; o ideal é ter unha conexión WIFI de 54Mbps como mínimo e que o teu ordenador dispoña dunha cobertura que lle dea polo menos 20Mbps constantes